daskor - facebook  daskor - css

Daskor

Katellig a lavar mont da Bariz

Genre
Roman
Langue
Breton
Source
Redon, Imprimeries Réunies, A. Bouteloup et fils aîné, 1913
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

D’ar sul war-lerc’h Katellig a skrivas da Wenola, ha setu amañ petra ’lavare dezhi :

    Gwenola ger,

Strafuilhet ’on bet gant da lizher. Peadra a yoa, e gwirionez, da vezañ souezhet.

Te a lavar din mont da Bariz !!… Biskoazh n’em boa soñjet e kement-se. Ha koulskoude, evit lavaret mat, un nebeut bloavezhioù a zo n’en em blijan ket nemeur war ar maez, ha ma vije bet kinniget labour din e Kemper pe en ur gêr all bennak eus hor bro, hep mar em bije lavaret kenavo d’ar parkeier ha d’ar saout. N’em eus ket bet a dro d’hen ober, ha setu perak emaon atav e Kerheol Fouenant.

Aet ’oac’h pemp pe c’hwec’h ac’halenn da Bariz, ur pennad a zo, hag o vezañ ne skrivont ket d’ar gêr da lavaret ez a fall an traoù ganto, e c’hellan krediñ ez eont bravik, koulz ha ganez, va mignonez.

Te a lavar a-walc’h mont da Bariz ! Ya, lavaret a zo aes !… Ha petra deuin-me da vezañ ur wech degouezhet eno ?… Setu an dalc’h !… N’eo ket ma tisplijfe din mont betek du-se ; abaoe m’am eus lennet da lizher zoken ez eus un dra bennak ennon o lavaret din e rankan mont.

Gwel eta, plac’h kaezh, ha te a gavo ur garg bennak evidon, n’eus forzh petra da gentañ, evit gwelet ; ma n’en em gavan ket em zu eno, goude me a glasko kaeroc’h.

N’em eus lavaret netra c’hoazh da’m zud. Ha da ober petra ez afen da spontañ anezho a-raok ma’z eus netra c’hraet ? Hag ouzhpenn-se, gouzout a ran e vezo gwall denn ar c’hrogad : an tad n’asanto biken.

O ! mar gallfen mont da’z kavout !

Hast afo skrivañ din ; ne badan mui gant ar vall am eus da vezañ e Pariz !

    Da c’hedal, kred ac’hanon ivez

    Da vignonez feal hag anaoudek,

    Katellig Kerheol