daskor - facebook  daskor - css

Daskor

Kerheol

Genre
Roman
Langue
Breton
Source
Redon, Imprimeries Réunies, A. Bouteloup et fils aîné, 1913
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

N’anavezit ket Kerheol ?… N’on ket souezhet gant an dra-se. N’eo ket ur foeltrenn kêr kennebeut, ha morse n’eus bet enni na prezidant na ministr oc’h ober prezegennoù meur…

Mont a ran eta da lavaret deoc’h e berr gomzoù pere eo doareoù Kerheol.

Kerheol (Kêr an heol) a zo ur geriadennig etre bourc’h Fouenant ha Beg Meil, a-zehoù, pa’z eer gant an hent bras, war-hed un hanter-lev eus ar mor, kuzhet en un draoniennig leun a wez avaloù.

Fouenant, evel a ouzoc’h, eo bro ar chistr mat, ar chistr kreñv, a ro nerzh d’an den ha tommder d’an izili. Dre eno e krog ar gwez avaloù, e tougont bleuñv ha frouezh kaer, koulz ha ma krog an derv en hor c’hoadoù. Fouenant a zo ur vro dudius-kenañ da welet en hañv. It di e mare gouelioù Pask ; ne welot nement bleuñv e pep lec’h : Fouenant a zo deuet da vezañ ur pezh liorzh.

Bremañ, ma karit ar mor, n’emañ ket pell, un hanter-lev, am eus lavaret.