Perig ha Janig

Genre
Roman
Langue
Breton
Source
Brest, Gwalarn, 1933
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Aleksandr Ar Gall
Dans le même ouvrage :

Koantañ plac’h yaouank ar Gêr-Wenn a oa Janig ar Mignon. An holl baotred yaouank a rae dezhi selloù flour, rak, ouzhpenn ma oa plac’h faro ha plac’h fur, e oa ur bennhêrez vat. He zud a zalc’he ur vereuri dezho o-unan. Ne chome ganto bugel ebet nemet Janig, hag e veze lavaret en devoa ar Mignon kozh ur yalc’hadig vrav a arc’hant.

Ar c’halanted a verve eta en-dro d’ar plac’h yaouank, met homañ ne zaleas ket d’ober he choaz. Perig ar Barzh e oa anv ar c’hoantiz eürus-se, ha, ret eo lavarout ar wirionez, dellezek e oant an eil ouzh egile.

Perig a oa labourer-douar evel e dud ma veve ganto. Diaes e vije kavout paotr yaouank gwelloc’h savet na reizhetoc’h egetañ. Ur garantez vras a skoulmas hep dale kalon an dud yaouank, hag, er vro tro-dro, e ouie an holl e oant prometet. Bale a raent a-gevret foarioù ha pardonioù. A-hend-all, pa veze falc’hadeg, dornadeg pe labourioù all e ti ar Mignon kozh, Perig a veze klasket da gas ar penn. Kement-mañ a roe tu d’ar yaouankizoù all da dabutal anezhañ ha da c’houlenn :

– Ac’hanta Perig, pegoulz e vo an eured ? Ro un tamm c’hoari kaer dimp un dro bennak. Skuizh omp o c’hortoz !

Per hag e zousig ne c’houlennent ket gwell, met ar re gozh ne oant ket c’hoazh tuet mat a-walc’h.

– Kemerit hoc’h amzer, bugale, a lavare tad Janig. An traoù n’int ket c’hoazh reizhet d’am soñj... Pelec’h ez eot an deiz war-lerc’h ?

– O ! du-mañ ez eus plas a-walc’h, a responte Per, ha va zud ne glaskont ket gwell eget kaout Janig en o zi.

– Amañ n’eo ket labour na frankiz a vank ivez, eme Janig. Aesoc’h e vije deoc’h, va zad, pa vije Per o terc’hel penn ganeoc’h.

– Ta, ta, ta, eme an tad, da bep evn e neizh. Tiegezh kozh ha tiegezh nevez n’int ket graet da vont asambles. Daou zen dimezet o deus ezhomm ul loch. Bremañ, n’eus mereuri ebet da feurmiñ dre amañ, met, eus an eil deiz d’an all, e c’hell degouezhout. Selaouit ali ho tad, bugale. N’ho pezo ket a geuz.

Hag an dud yaouank a blege.