Itron Varia Folgoad (4)

Genre
Poésie
Langue
Breton
Source
Paris, Didier et Cie Libraires, 1867
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    IV

Pa’z ae ’r senechal da ver’nniañ,
Az eas ar c’hrouger d’he c’hrougañ.

A-benn ur pennadig goude,
Dont a reas d’e gaout-e* :    [eñ] 

– Aotroù senechal, me ho ped,
Mari Fañchonig na varv ket ;

Pa daolan va zroad war he skoaz,
Distreiñ da c’hoarzhin ouzhin ’ra.

– Taolit-hi ha didaolit-hi,
Kasit-hi d’ar fagodiri.

– Taolomp-hi ha didaolomp-hi,
Greomp tan ha moged d’he leskiñ ! –

A-benn ur pennadig goude,
Dont a rae ’r c’hrouger adarre :

– Aotroù senechal, me ho ped,
Mari Fañchonig na varv ket ;

’Mañ en tan betek he divronn ;
C’hoarzhin a ra ’leizh he c’halon.

– Pa gredin pezh a leveret,
Ar c’habon-mañ ’n devo kanet. –

(Ur c’habon rostet war ur plad,
Ha debret nemet e zaoudroad.)

Ar senechal oa souezhet :
Ar c’habon en devoa kanet.

– Mari Fañchonig, me ho ped,
Me zo faziet, c’hwi n’oc’h ket ;

Me zo faziet, c’hwi n’oc’h ket :
Petra zo en tan d’ho miret ?

– An itron Varia Folgoad
Zo ’skubañ dindan va daou droad ;

Ar Werc’hez, mamm ar gristenien,
Zo ’skubañ en-dro da’m c’herc’henn.

– Ret eo kas prim da Wigourvez,
Kas prim da di ar vererez ;

Kas prim da di ar vererez,
Da c’houzout piv eo pec’herez. –

Tremenet ’oant holl dre an tan,
Ha nikun na lakeas man ;

Tremenet holl hep lakaat man :
Nemet ar vatezh he-unan.