Kouskit e peoc’h !

Genre
Poésie
Langue
Breton
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Précisions
Kroaz ar Vretoned, 29/10/1916
Transcription
Sébastien Marineau
Dans le même ouvrage :

    d’an Aotroù Bellanger, « difennour Breizh »

Kouskit e peoc’h, brezelourien
Marvet evel gwir verzherien
O stourm ouzh hon enebourien.

Amañ, e korn un draoniennig,
Pell diouzh pep lec’h, hoc’h-unanig,
Ra vo diskuizhus ho hunig !

Nebeut, hep mar, a ziskenno,
Nebeutoc’h c’hoazh a zaoulino
War ho pez, dirak ho anv.

Met, ni, ho kenvreudeur vrezel,
Ne c’houl’omp ket ho tilezel :
Hon fedenn a vo deoc’h skoazell.

Rak, daoust m’oc’h amañ douaret,
Hoc’h eñvor, soudarded karet,
A vezo ganeomp holl miret.

Ni a gaso d’ho tud, d’ho pro,
Mar gallomp c’hoazh donet en-dro,
Keloù glac’harus ho marv.

Lâret penaos ’oc’h bet tizhet,
Ha pelec’h ez oc’h bet kouezhet,
Int a vo muioc’h frealzet.

Penaos, kent kuitaat an draonienn,
Hon eus laket war ho pez yen
Ur groaz arouez ar Gristenien.

Hag, ouzh troad ar groaz, bleuniennoù,
Kimiad tener hon c’halonoù,
Hag, a-us d’e, hon fedennoù.

Kenavo, eta, breudeur ker !
Ni a gendalc’h gant ar Gwasker :
Ho marv a zo deomp skouer gaer.

Ha, c’hoazh, e korn an draoniennig,
Pell diouzh pep lec’h, hoc’h-unanig,
Ra vo diskuizhus ho hunig !