daskor - facebook  daskor - css

Daskor

VI diviz

Genre
Théâtre
Langue
Breton
Source
Brest, Moulerezh ru ar C’hastell, 1912
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

HERMANN kousket atav, PANKRAS, RUSTICUS, FULVIUS, TERTULLUS, AN TRI OFISER, DAOU SOUDARD, LUCIAN. An daou soudard a zegas Lucian da vezañ barnet. Tertullus a azez war e gador-varn.

TERTULLUS
Fulvius, ar re a dle bezañ barnet en dro-mañ, pet zo anezho ?

FULVIUS
Tri, aotroù prefed, un den kozh-bras ha daou zen yaouank. An hini kozh eo a zo bet paket da gentañ.

TERTULLUS
Degasit diouzhtu an hini kozh diragon, neuze. Lucian a ya. Lavar din da anv ha da vicher.

LUCIAN
Lucian a reer ac’hanon, ha n’eo ket ur vicher eo em eus, met ur garg, hag hi ar gaerañ ma c’hellfed kaout er bed-mañ.

TERTULLUS
Pehini ?

LUCIAN
Ar garg a veleg. Hag an Doue ma’z on-me e veleg da viken, n’em eus an disterañ aon evit lavaret e anv a vouezh kreñv. An Aotroù Jezuz-Krist eo. An doueoù all n’int nemet falz doueoù.

TERTULLUS
Ma leverez adarre drouk-komzoù a-enep hon doueoù-ni, gourc’hemenn a rin toullañ da deod gant un houarn ruziet ouzh an tan.

LUCIAN
Ha pa ve devet a-bezh va zeod, daoust ha ne c’hellfen ket evelato meuliñ ha pediñ Doue gant va spered, ennon va-unan ?

TERTULLUS
Lez da ober ; me a viro ouzhit da bediñ ha da veuliñ n’eus forzh piv. Fulvius, galvit an daou gristen all. Pankras ha Rusticus a ya dirak kador ar Prefed.

FULVIUS
Setu i o-daou, aotroù prefed. Ar re-se o deus disprizet an impalaerien o strinkañ a-dammoù al lezenn nevez.

TERTULLUS da Bankras
Piv a reer ac’hanout ?

PANKRAS
Pankras, mab Quintinus, bet merzheriet.

TERTULLUS
Te eo hag ec’h eus roget skrid al lezenn ?

PANKRAS
Me eo, hag hel lavaran a vouezh uhel.

TERTULLUS
Nebeutoc’h a fouge, emichañs, a vezo ennout warc’hoazh, pa vezi barnet da stourm a-enep al leoned hag an tigred, pa vezo drailhet da gorf ganto, evel m’ac’h eus roget, te da-unan, lezenn an impalaerien.

PANKRAS
Ma trailhont va c’horf, ne zrailhint ket va ene.

TERTULLUS droug ennañ
Penn kalet ma’z out ! Lavar ’ta ! Ha n’oa nemedout o freuzañ an traoù evel-se ?

RUSTICUS
Freuzet em eus ivez, aotroù Prefed, ha dre-se em eus gounezet un enor ken bras hag hini Pankras. Ar pezh en deus lavaret deoc’h, me hel lavar ivez.

TERTULLUS da Fulvius
Penaos ’ta, Fulvius, o deus gellet an daou-se ober kement-se ? N’oa den ebet o tiwall ’ta, neuze ?

FULVIUS
Eo, aotroù Prefed, ar soudard Hermann oa bet lakaet.

TERTULLUS
Pelec’h emañ eñ ?

FULVIUS o welet Hermann kousket atav
Foeltr Jupiter ! Kousket eo ! o tihunañ Hermann hag ouzh e gas dirak ar Prefed.
Setu eñ, aotroù Prefed.

TERTULLUS rust e vouezh da Hermann
Deus amañ, koll-bara ; daoust ha n’ec’h eus ket gwelet ar re-se o tiframmañ al lezenn ?

HERMANN o chom strafuilhet naet
Al lezenn ?

TERTULLUS
Ya. Petra a rez-te abaoe ar mintin-mañ ?

HERMANN
Kousket. Pa vezan skuizh, e kouskan.

TERTULLUS o c’hoarzhin yud
Ha, ha, ha, ha ! Kousket ? mat eo. Me az lakaio da gousket da viken. Kent na varnin an tri-se, ur varnedigezh all am eus da zougen.
An hini a vez graet Hermann anezhañ a zo ur soudard fall, disleal ha digalon en deus lezet torfederien gristen da regiñ ar pezh a oa bet graet gant an impalaerien. Barn a reomp anezhañ da vezañ lazhet hiriv a daolioù kleze.

HERMANN o ouelañ
Ho pet truez ouzhin, aotroù Prefed.

TERTULLUS
Truez ebet ; kae kuit diouzhtu. Soudarded, taolit anezhañ er-maez. An daou soudard a ya er-maez, Hermann ganto. Ha bremañ, hastomp afo gant ar re all. O komz outo. A-walc’h eo gant an holl draoù diskiant ho peus glabouzet din da gentañ. Un truez bras am eus ouzhoc’h, yaouank-flamm evel ma’z oc’h. N’oc’h ket peurgollet c’hoazh, daoust d’ho torfed skrijus. An dud yaouank, a-wechoù, a zo skañv o spered.
Reiñ a rin deoc’h ho puhez, mar fell deoc’h deviñ ezañs dirazon en anv an doue Jupiter.

PANKRAS
Ni a zo gwelloc’h ganeomp gouzañv mil marv kriz kentoc’h eget deviñ ezañs dirak ur gozh skeudenn m’emañ an droug-spered kuzhet enni.

LUCIAN HA RUSTICUS a-unan
Barnit ac’hanomp da vervel.

TERTULLUS kounnar ennañ
N’eo ket diaes : Ni, Prefed Rom, en anv sakr Diocletian ha Maximian, a zoug hor barnedigezh a-enep ar gristenien Lucian, Pankras ha Rusticus.
Ar c’hentañ a zo savet gantañ c’hoant da ziskar brasañ doueoù kêr Rom. An daou all o deus diframmet lezennoù mistri ar bed, hag ouzhpenn ec’h anzavont o zorfed gant ur fouge zispar.
Rak se, hervez ar galloud hor beus a-berzh an impalaerien, gourc’hemenn a reomp ma vezo an tri c’hristen aheurtet-se lakaet da stourm, warc’hoazh, a-enep al leoned, dirak an holl bobl.

LUCIAN, PANKRAS, RUSTICUS a-unan
Gloar da Zoue galloudus ar gristenien !