Kentañ diviz

Genre
Théâtre
Langue
Breton
Source
Saint Brieuc, Moulerezh Sant Gwilherm, 1917
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

MEVEN, KOLOMBAN, HERVE an tri en o za, o pediñ

MEVEN
Doue an Tad, doue ar Mab, doue ar Spered Santel ! Treinded sakr o vezañ un Doue hepken, ni ho ped a greiz hor c’halon evit ma plijo gant ho madelezh sellet ouzhomp.

HERVE HA KOLOMBAN a-unan
Evel-se bezet graet !

MEVEN
Ni ho ped a greiz hor c’halon evit Breizh, evit ar vro a garomp. Enebourien Breizh a zo bras o c’hounnar, hag evito da vezañ kristen eveldomp, fellet eo bet dezho sevel a-enep deomp, ha laerezh douar sakr hon tadoù-kozh. Doue hollc’halloudek, ho pezet truez ouzhomp.

HERVE HA KOLOMBAN a-unan
Evel-se bezet graet !

MEVEN
Bez ez eus bet, Aotroù Doue, aelez santel hag a zo chomet leal en ho keñver. An aotroù Sant Mikael venniget, o tougen en e zorn ur c’hleze graet gant al luc’hed, en deus stlapet an aelez fall en ifern. Doue kreñv ! Doue ar brezel, ni ho ped a greiz-kalon. Ra vezimp-ni heñvel ouzh an aelez vat. Ra vezo hor roue Judikael heñvel ouzh Sant Mikael. Ra vezo e gleze trec’h d’ar Franked.

HERVE HA KOLOMBAN a-unan
Evel-se bezet graet !

MEVEN
Roit deomp, dreist-holl, ha d’ar Vreizhiz karet, ur vuhez santel war an douar, hag ar vuhez a bado da viken er baradoz.

HERVE HA KOLOMBAN a-unan
Evel-se bezet graet !

An tri a ra sin ar groaz a-unan.

MEVEN
Ha petra ’ouzoc’h a-nevez, va bugale geizh, diwar-benn an emgann ?

KOLOMBAN
Nebeud a dra, va zad, nemet m’hon eus klevet mintin-mañ, Herve ha me, o labourat er parkeier, trompilhoù o seniñ kaer war-zu ar sav-heol.

MEVEN
Ha n’ho peus ket gwelet piv a vije o seniñ ?

HERVE
N’hon eus ket, ha n’edomp ket evit hen ober a-dreuz da goadoù teñval Brekelien, a en em astenn tro-war-dro da vanati Gael.